Drogba tryggði Chelsea sigur á Barcelona

Chelsea vann í kvöld sannfærandi sigur á Barcelona 1-0 í Meistaradeild Evrópu. Eiður Smári Guðjohnsen var í byrjunarliði Barcelona en náði sér ekki á strik frekar en félagar hans í liðinu og var skipt af velli á 60. mínútu. Didier Drogba skoraði sigurmarkið á 47. mínútu með laglegu skoti og Chelsea er komið í vænlega stöðu í riðlinum með fullt hús eftir þrjá leiki.

Chelsea fékk fleiri færi til að skora en gestirnir og voru bæði Drogba og Shevchenko klaufar að skora ekki fleiri mörk. Sigur Chelsea var fyllilega verðskuldaður og gestirnir frá Spáni virkuðu oft á tíðum úrræðalitlir gegn mjög vel skipulögðu liði Chelsea. Í sama riðli vann Bremen 2-0 sigur á Levski.

Liverpool vann mikilvægan 1-0 útisigur á Bordeux í Frakklandi, Inter lagði Spartak Moskva 2-1, Bayern vann Sporting úti 1-0, PSV lagði Galatasaray úti 2-1, Valencia vann Shakhtar 2-0 og Roma lagði Olympiakos 1-0 á útivelli.