Baunar áfram á Barcelona

Jose Mourinho hrósaði baráttuanda sinna manna í gærkvöld þegar lið Chelsea náði jöfnu gegn Barcelona í Meistaradeildinni, en hann gat ekki stillt sig um að bauna aðeins á Frank Rijkaard þjálfara.

"Ég er mjög ánægður með öfluga frammistöðu minna manna í gær en það er sannarlega ekki auðvelt að vera dómari í leik sem þessum, þar sem leikmenn Barcelona voru sífellt liggjandi í vellinum. Frank er heppinn að leikmenn hans fá svona góða vörn frá dómaranum, því þetta var alls ekki harður leikur. Það var samt alveg sama hversu ómerkileg brot voru á ferðinni - alltaf voru 7-8 leikmenn Barcelona komnir í kring um dómarann að heimta spjald," sagði Mourinho, sem sjálfur hefur þó í röðum sínum annálaðar væluskjóður.

"Bæði liðin settu pressu á dómarann í leiknum, en annað áberandi meira en hitt," sagði Mourinho.