Villarreal hefur áhuga á Saviola

Forráðamenn spænska liðsins Villarreal hafa mikinn áhuga á að fá argentínska landsliðsmanninn Javier Saviola í sínar raðir og eru ekki eina liðið sem sýnt hefur leikmanninum áhuga undanfarið. Saviola hefur ekki átt fast sæti í liði Barcelona þrátt fyrir að allir séu sammála um hæfileika hans.

"Það er einfaldlega slæmt fyrir knattspyrnuna að menn eins og Saviola fái ekki að spila í hverri viku því allir vita hvað hann er sterkur leikmaður. Ég veit ekki af hverju hann fær ekki fleiri tækifæri hjá Barcelona en ég er viss um að hann gæti spjarað sig hvar sem hann spilaði," sagði þjálfari Villarreal, en talið er að Atletico Madrid, Sevilla og nokkur félög í ensku úrvalsdeildinni séu að íhuga tilboð í hinn smáa en knáa framherja.