Hargreaves er falur fyrir 20 milljónir punda

Sápuóperunni í kring um enska landsliðsmanninn Owen Hargreaves hjá Bayern Munchen er hvergi lokið og í dag sagði forseti Bayern, Franz Beckenbauer, að félagið myndi ekki íhuga að selja hann fyrr en það fengi 20 milljón punda tilboð í leikmanninn.

Manchester United hefur lengi verið á höttunum eftir leikmanninum og Hargreaves hefur þegar lýst yfir áhuga sínum á að spila í heimalandi sínu. Forráðamenn Bayern eru þó alls ekki á því að gefa eftir og halda því stöðugt fram að hann sé ekki til sölu. Hargreaves er enn að jafna sig eftir fótbrot og verður líklega ekki klár í slaginn þegar þýska úrvalsdeildin fer af stað á ný þann 26. janúar.