Eto´o neitaði að spila í gær

Framherjinn Samuel Eto´o hjá Barcelona neitaði að fara inná sem varamaður þegar fimm mínútur voru eftir af leik Barcelona og Santander í gærkvöld. Eto´o er hægt og bítandi að ná heilsu eftir hnémeiðsli, en neitaði að fara að hita upp þegar hann var beðinn um það í gær.

Það var sjálfur Eusebio sem bað framherjann að fara að hita upp þegar fimm mínútur voru eftir af leiknum, en Eto´o neitaði. Hann gaf ekki skýringar á athæfi sínu, en mun þurfa að svara fyrir sig hjá Frank Rijkaard á æfingu í dag.

"Samuel hefur verið lengi frá vegna meiðsla og við verðum því að styðja hann í einu og öllu þegar hann snýr til baka eftir þessa erfiðu tíma," sagði forseti Barcelona og bætti því við að hann treysti Rijkaard fullkomlega til að leysa úr þessu máli.