Sharapova og Williams ekki með í Dubai

Maria Sharapova, stigahæsti tennisspilari heims í kvennaflokki, og Serena Williams, sigurvegari Opna ástralska meistaramótsins frá því fyrir skemmstu, hafa afboðað komu sína á Opna Dubai mótið sem hefst í næstu viku. Þetta er mikið áfallt fyrir mótshaldara í Dubai, enda höfðu einhverjir gert sér vonir um að þær myndu endurtaka úrslitaviðureignina frá því í Ástralíu á mótinu.

Sharapova á við smávægileg meiðsli í læri að stríða en Williams hefur verið illa haldin af flensu síðustu daga og treystir sér ekki að taka þátt í öflugu móti svo skömmu eftir veikindin. “Ég er búin að prófa allt til að ná þessum veikindum úr mér en ekkert gengur. Dubai-mótið er eitt af mínum uppáhalds mótum, svo að ég er miður mín vegna þessa,” sagði í tilkynningu frá Williams.