Björgvin á 3 högg á Örn Ævar þegar mótið er hálfnað

Björgvin Sigurbergsson úr GK hefur þriggja högga forystu í karlaflokki þegar Íslandsmótið á Hvaleyrinni er hálfnað. Hann lék hringinn í dag á 70 höggum, eða einu höggi undir pari og er samtals á 138 höggum, eða 4 höggum undir pari.

Örn Ævar Hjartarson úr GS, sem lék á 73 höggum í dag, er í öðru sæti á 141 höggi. Þrír kylfingar deila þriðja sæti; Ólafur Már Sigurðsson úr GR, sem lék á 72 höggum í dag, Birgir Leifur Hafþórsson úr GKG, sem lék á 75 höggum, Heiðar Davíð Bragason úr GKj, sem lék á 72 höggum í dag og Hlynur Geir Hjartarson sem lék á 70 höggum í dag. Þeir eru allir á 2 höggum yfir pari, sex höggum á eftir Björgvini.

Davíð Már Vilhjálmsson úr GKj lék á 72 höggum í dag og er samtals á 3 höggum yfir pari. Félagi hans, Kristján Þór Einarsson, lék á 77 höggum í dag og er samtals á 4 höggum yfir pari eins og Ottó Sigurðsson úr GKG sem lék á 73 höggum í dag.

Ólafur Már, stigameistari síðasta árs, verður í síðasta ráshópi á morgun með þeim Björgvini Sigurbergssyni og Erni Ævar Hjartarsyni. Í næst síðasta ráshópi verða Birgir Leifur Hafþórsson, Heiðar Davíð og Kristján Þór Einarsson.

Keppendum verður fækkað eftir hringinn í dag - 72 efstu í karlaflokki komast á fram og 18 efstu í kvennaflokki. Keppni er ekki enn lokið í karlaflokki og því ekki ljóst hverjir þurfa að bíta í það súra epli að fá ekki að leika tvo síðustu hringina.

Kylfingur.is