Birgir Leifur enn í stuði

Birgir Leifur Hafþórsson var í miklu stuði í gær þegar hann lék á móti á vegum Kaupþings á Lariserva golfvellinum á Spáni á nýju vallarmeti - 11 höggum undir pari.

Birgir lék reyndar af gulum teigum á mótinu en árangurinn er engu að síður frábær - 61 högga hringur. Birgir sagðist í samtali við Kylfing.is vera afar sáttur við hringinn sem hefði verið sannkallaður draumur. Hann segist einu sinni hafa leikið á 61 höggi áður en þá hafi hann endað á 9 undir pari á móti á Íslandi.

Birgir hefur dvalist á Spáni í þrjár vikur en heldur brátt til Austurríkis þar sem hann er búsettur. Eftir tæpar tvær vikur fer hann svo til Suður-Afríku þar sem til stendur að spila á tveimur mótum í næsta mánuði.