Málfríður og Dóra María framlengja við Val

Landsliðskonurnar Dóra María Lárusdóttir og Málfríður Erna Sigurðardóttir hafa báðar framlengt samninga sína við Íslandsmeistara Vals í Landsbankadeildinni.

Dóra María er 23 ára gömul og skrifaði undir tveggja ára samning fyrir helgina. Hún sneri aftur hingað til lands fyrir síðasta tímabil eftir að hafa verið við nám í Bandaríkjunum.

Dóra María fór á kostum með íslenska landsliðinu í úrslitaleiknum um laust sæti á EM þegar hún skoraði tvö mörk og lagði upp annað. Hún var kjörin leikmaður ársins í Landsbankadeild kvenna og skoraði 15 mörk í 17 leikjum í sumar.

Í dag greindi svo fotbolti.net frá því að Málfríður Erna hefði skrifað undir tveggja ára samning við Val, en hún hefði orðið samningslaus um áramótin líkt og Dóra María.

Málfríður er 24 ára gömul og hefur allan sinn feril spilað með Val. Hún lék 17 deildarleiki með Val síðasta sumar og skoraði í þeim sex mörk. Hún var í 23 manna hópi íslenska landsliðsins í sumar.