Charlton fylgist með Kristjáni Erni

Útsendari frá enska B-deildarliðinu Charlton mun á morgun fylgjast með Kristjáni Erni Sigurðssyni er hann spilar með Brann gegn Everton í UEFA-bikarkeppninni.

Samkvæmt norskum fjölmiðlum hefur Charlton fylgst með Kristjáni Erni um nokkurt skeið en hann hefur verið orðaður við fleiri lið á Englandi.

„Krissy býr yfir mikilli reynslu með íslenska landsliðinu og er góður leikmaður. Það kemur því ekki á óvart að það sé áhugi fyrir honum," sagði Roald Bruun-Hanssen, yfirmaður íþróttamála hjá Brann.

„Við höfum þó ekki nein formleg tilboð eða fyrirspurnir vegna hans en við skulum sjá hvað gerist."