Tiger Woods ætlar að hætta áður en neistinn fer

Stjörnugolfarinn Tiger Woods segist ætla að leggja kylfuna á hilluna áður en hann verður útbrunninn golfari. Tiger hefur aldrei verið í betra formi en nú og hafði unnið sjö mót í röð áður en hann hafnaði tveimur höggum á eftir Geoff Ogilvy um síðustu helgi.

„Þetta er ekki flókið mál. Þegar mitt besta er ekki nógu gott lengur þá mun ég hætta að keppa," sagði hinn 32 ára Tiger í viðtali við Reuters fréttastofuna.

„Ég gæti ekki lifað við það að fara á æfingar og undirbúa mig eins og ég get vitandi það að þó ég fari út og nái mínum besta leik þá muni ég samt vera sigraður. En svona er þetta, aðrir menn verða betri. Þú færð þinn tíma í sólinni og það er ekkert óeðlilegt að ganga frá henni síðan."

„Ég hef afrekað mjög mikið í þessari íþrótt nú þegar og vonandi get ég haldið því áfram eins lengi og hægt er. En allir íþróttamenn vita að sá tími kemur að leiðin liggur bara niður. Einn af mörgum kostum við golf-íþróttina er sú hve lengi maður getur verið í henni," sagði Tiger Woods sem er viss um að hann eigi nokkuð mörg góð ár eftir og er ekki farinn að sjá fyrir endann á ferlinum.