Karen Millen í grimmilegum bardaga um Byr

Tískuvöruframleiðandinn Karen Millen, hefur blandað sér í grimmilegan bardaga um stjórnvölin í einum stærsta banka Íslands. Leynd hefur hingað til hvílt yfir eignarhlut hennar í bankanum en hún styður þann hóp sem vill að leynd hvíli yfir lánabókum bankans. Það er breska blaðið The Telegraph sem gerir þetta að umtalsefni í dag.

Síðan er sagt frá því að tískudrottningin hafi verið neydd til þess að verja aðild sína að ráðabrugginu sem hefur einkennt bankann undanfarið, en saga bankans mánuðina fyrir hrun bankanna hafi verið ansi skrautleg.

Þá segir að í þessari viku hafi verið upplýst að Karen Millen væri einn af stofnfjáreigendum bankans en hún hafi hingað til haldið hlut sínum leyndum í gegnum félag í Lúxemborg.

Nokkuð ítarlega er fjallað um stöðu Byrs í fréttinni og þeim átökum sem hafa átt sér stað þar undanfarið. Bankinn er sagður hafa verið rekinn líkt og aðrir sparisjóðir hér á landi þar til hann var tekinn yfir fyrir þremur árum af Baugi Group. Undanfarið hafi íslendingar mótmælt 13 milljarða arðgreiðslum sem hafi verið greiddar út af þeim sem Baugur setti inn í stjórn bankans.

Karen Millen sagði í tilkynningu í síðustu viku að Ágúst Ármann, faðir Magnúsar Ármann, hefði kosið í umboði fyrir sig á aðalfundi Byrs. Sveinn Margeirsson nýkjörinn stjórnarmaður í Byr sagði hinsvegar síðar sama dag að Millen væri ekki á lista yfir stofnfjáreigendur, heldur væri hluturinn á nafni Kaupþings í Lúxemborg.