Bill Clinton vinur og ráðgjafi nýs eigenda að Eimskip

Bill Clinton fyrrum forseti Bandaríkjanna var einn af nánustu vinum og ráðgjöfum Ronald Burkle sem á eignarhaldsfélagið Yucaipa Companies sem nú eignast 32% í nýju Eimskipi. Raunar hefur Hillary Clinton einnig verið á mála hjá Burkle.

Samkvæmt úttekt í tímaritinu Forbes um Burkle er hann sagður einn af öflugustu fjáröflunarmönnum Demókrataflokksins í Bandaríkjunum og það var í gegnum það starf sem hann kynntist Clinton hjónunum. Samkvæmt skattskýrslu Bill Clinton námu greiðslur Yucaipa Companies til forsetans fyrrverandi 12,5 milljónum dollara, eða 1,6 milljarði kr. á árabilinu 2003 til 2006.

Samkvæmt uppgjöri úr kosningabaráttunni um forsetaframboð Hillary Clinton árið 2007 námu greiðslur Yucaipa til hennar árið 2007 um 2,5 milljónum dollara.

Þá telst Burkle einnig til vinahóps Al Gore. Hann aðstoðaði Al Gore við kaup á sjónvarpsstöð í Kanada eftir að Gore tapaði forsetakosningunum 2004. Lagði hann til 30 milljónir dollara í kaupin en talið er að sú fjárfesting hafi tífaldast í verðmæti síðan.

Yucaipa Companies var stofnað af Burkle árið 1986, er staðsett í Los Angeles og hefur síðan náð miklum árangri í skuldsettum yfirtökum á stórmörkuðum og dagvöruverslunum. Á síðustu árum hefur sjóðurinn þannig eignast Wild Oats Markets í Colorado, Pathmark Stores í New Jersey og Supervalu í Minnesota svo dæmi sé nefnd.

Sjálfur er Burkle sonur verslunareigenda í Kaliforníu. Hann hætti í skóla á unglingsárunum og vann síðan í 15 ár í verslun föðurs síns og félagsins sem átti hana. Árið 1981 reyndi hann að yfirtaka félagið en sú yfirtaka klúðraðist. Síðan hefur leiðin legið upp á við og telur Forbes að persónuega auðæfi Burkle, sem er 58 ára gamall, vera um 2,5 milljarða dollara eða um 317 milljarða kr.