Alþjóðabankinn, evrópski fjárfestingabankinn og evrópski þróunarbankinn munu samtals veita 25 milljörðum evra, eða um 3.600 milljörðum kr. til að hjálpa fyrirtækjum og bönkum Austur-Evrópu að reisa sig við.
Greining Íslandsbanka fjallar um málið í Morgunkorni sín en þar segir að eins og kunnugt er hefur Austur- Evrópa verið sérstaklega viðkvæm fyrir storminum sem nú ríkir á alþjóðlegum fjármálamörkuðum. Úkraína, Ungverjaland, Hvíta Rússland og Serbía hafa nú þegar leitað á náðir Alþjóðagjaldeyrissjóðsins eftir aðstoð.
Hagkerfið þessara ríkja hafa á undanförnum mánuðum gengið í gengum miklar eignaverðslækkanir samhliða því sem fjárfestar hafa dregið sig út úr áhættusamari nýmarkaðsfjárfestingum. Þá hefur samdráttur í helstu viðskiptaríkjum Austur-Evrópu neikvæð áhrif á útflutningstekjur þeirra auk þess sem aðgangur að fjármagni hefur gott sem lokast. Þetta hefur orðið til þess að mörg ríki Austur-Evrópu hafa þegar orðið kreppunni að bráð á meðan önnur hanga á bjargbrúninni.
Ungverjaland vill hinsvegar að meira fé verði notað í björgunarleiðangurinn og að Evrópusambandið taki sér forystuhlutverk í björgunarleiðangrinum. Ungverjaland varð eins og kunnugt er aðili að ESB árið 2004. Að mati Ferenc Gyurcsany, forsætisráðherra Ungverjalands er forgangsatriði að stöðva gengisfall austur- evrópsku myntanna sem ógna nú öllum fjármálastöðugleika á svæðinu.
