Sonur David Gill í hópnum hjá Man. Utd

Meiðslavandræði Man. Utd eru það mikil að Sir Alex Ferguson hefur þurft að velja son David Gill, framkvæmdastjóra félagsins, í hópinn fyrir leikinn gegn Wolfsburg í Meistaradeildinni.

Sá heitir Oliver Gill og er 19 ára gamall. „Ef hann er nógu góður þá spilar hann," sagði Ferguson.

United vantar tólf leikmenn í hópinn hjá sér fyrir leikinn. United þarf að ná jafntefli í leiknum til þess að tryggja sér toppsæti riðilsins.

„Sonur minn var í hópnum í fjögur eða fimm ár og hann fékk sömu meðferð og allir hinir. Það sama verður upp á teningnum hjá Oliver," sagði Ferguson.