Brown vill lög til að koma í veg fyrir launabónusa

Gordon Brown, forsætisráðherra Breta, ætlar að banna bónuslaunakerfi sem tíðkaðist í bönkunum fyrir fjármálakreppu. Hann ætlar að neyða bankana til þess að hegða sér með ábyrgari hætti.

Brown sagði í samtali við BBC, breska ríkisútvarpið, í morgun að stjórnendur bankanna skildu ekki hvílíkan skaða þeir hefðu unnið hagkerfinu og hann ætlaði að grípa til sinna ráða til þess að beina þeim inn á réttar brautir.

„Við ætlum að hreinsa upp kerfið í eitt skipti fyrir öll," sagði Brown. „Þetta verða hörðustu aðgerðir sem gripið hefur verið til í heiminum," sagði Brown jafnframt. „Við ætlum ekki að standa hjá og snúa aftur til gamalla tíma," bætti hann við.

Brown ætlar að breyta lögum um Fjármálaeftirlitið þannig að það fái heimild til að hindra bankastjórnendur í að taka of mikla áhættu. Fyrirtæki sem muni ekki hlýða þessum lögum muni sæta refsingum.

Hann sagði að þessi nýju lög væru nauðsynleg því að það væru vísbendingar um að bankarnir væru að fara aftur í að greiða háar launafjárhæðir sem voru meðal annars hvatinn að mikilli áhættusækni sem leiddi til fjármálakreppunnar.