UK Coal skuldar Landsbankanum 1,2 milljarða

Heildarútlán Landsbankans til UK Coal, stærsta kolanámufélags Bretlands, nam rúmum 5,7 milljónum punda sem jafngildir um 1,2 milljörðum króna. Heildarlánaheimildir til félagsins voru rúmar 21,4 milljónir punda eða tæplega 4,5 milljarðar króna. Líkt og Vísir greindi frá fyrr í morgun glímir UK Coal nú við vaxandi skuldavandamál í rekstri sínum.

Samkvæmt frétt um málið í The Guardian er Landsbankinn einn af þremur viðskiptabönkum félagsins og hefur staða Landsbankans flækt samningaviðræður við lánadrottnanna um áframhaldandi stuðning við rekstur félagsins.

Miklar niðurfærslur á verðmæti lands í eigu UK Coal hafa leitt til þess að félagið var rekið með um 16,5 milljarða króna tapi á fyrstu sex mánuðum ársins.

Af þessum sökum hafa viðskiptabankar UK Coal neyðst til þess að fresta uppgjöri á lánasamningum upp á 72 milljónir punda og eiga í viðræðum við félagið um framlenginu á lánum upp á 100 milljón punda í viðbót sem koma áttu til greiðslu fyrir árslok.

Nokkrum dögum áður en Landsbankinn fór í þrot námu heildarútlán bankans til UK Coal rúmum 5,7 milljónum punda en heildarlánaheimildir til félagsins voru rúmar 21,4 milljónir punda eða tæplega 4,5 milljarðar króna.

Það kemur því töluvert á óvart að Landsbankinn sé einn af þremur lánveitendum UK Coal eins og The Guardian fullyrðir en útlán Landsbankans nema samkvæmt þessu einungis 3,3 prósentum af heildarlánum UK Coal.

Sé hins vegar miðað við heildarlánaheimildir nemur hlutfall Landsbankans í skuldum UK Coal rúmlega 12,4 prósentum af heildarlánaheimildum UK Coal.

UK Coal er skráð í FTSE 250 vísitöluna á hlutabréfamarkaðinum í London og hefur gengi hlutabréfa félagsins lækkað um 73% síðan í lok ágúst á síðasta ári.