Landstjóri Guernsey fagnar málshöfðun gegn neyðarlögunum

Lyndon Trott landstjóri á Guernsey segir að hann fagni fyrirhuguðu dómsmáli innistæðueigenda í útibúi Landsbankans á eyjunni. Ennfremur muni stjórnvöld á eyjunni styðja við bakið á innistæðieigendunum fari mál þeirra fyrir íslenska dómstóla.

Eins og áður hefur komið fram hefur dómstólinn The Royal Court á eyjunni veitt heimild fyrir innistæðueigendurnar að sækja mál sitt fyrir íslenskum dómsmálum. Yrði málshöfðunin rekin gegn neyðarlögunum sem sett voru s.l. haust. Slíkt verður gert ef kröfur eyjaskeggja verða ekki gerðar að forgangskröfum í þrotabú Landsbankans eins og aðrar Icesave kröfur.

Í frétt um málið á BBC segir að alls hafi um 1.600 íbúar á Guernsey átt innistæður hjá Landabankanum á eyjunni. Trott segir í samtali við BBC að stjórn Guernsey muni halda áfram þrýstingi sínum á að innistæðueigendurnir njóti sama réttar og aðrir kröfuhafar sem ekki eru íslenskir.

Fram að þessu hafa innistæðueigendur Landsbankans á Guernsey fengið 55% af körfum sínum endurgreiddar. Í heild nema kröfur þeirra 3,5 milljónum punda.