Umfjöllun: Dramatískur sigur Þórs/KA gegn Val

Norðanstúlkur í Þór/KA gerðu góða ferð á Hlíðarenda þar sem þær unnu Íslandsmeistara Vals 1-2 í fjörugum leik.

Valur, Breiðablik og Stjarnan eru öll efst og jöfn með 32 stig en Þór/KA kemur svo næst með 29 stig þegar aðeins fjórar umferðir eru eftir af Íslandsmótinu.

Jafnræði var með liðunum framan af leik en Valsstúkur ógnuðu í tvígang snemma leiks þegar Dóra María Lárusdóttir og Kristín Ýr Bjarnadóttir áttu báðar skalla að marki Þórs/KA með stuttu millibili. Markvörðurinn Berglind Magnúsdóttir var vel á verði.

Norðanstúlkum óx svo ásmegin eftir því sem líða tók á hálfleikinn og náðu trekk í trekk að galopna Valsvörnina með hættulegum stungusendingum á hinar eldsnöggu Mateja Zver, Vesna Smiljkovic og Rakel Hönnudóttur.

Smiljkovic komst ein inn fyrir vörn Vals um miðjan hálfleikinn en þá varði María Björg Ágústsdóttir glæsilega í tvígang frá henni af stuttu færi.

María Björg kom þó engum vörnum við í blálok fyrri hálfleiks þegar Zver slapp inn fyrir vörn Valsstúlkna og skoraði af öryggi, í slána og inn.

Valsstúlkur voru reyndar afar óánægðar með að markið hefði fengið að standa þar sem þær töldu Zver hafa verið rangstæða en markið stóð og Norðanstúlkur leiddu 0-1 þegar hálfleiksflautið gall.

Valsstúlkur voru talsvert frá sínu besta í fyrri hálfleik og áttu erfitt með að finna glufur á varnarmúr Þórs/KA en allt annað var að sjá til Íslandsmeistarana í upphafi síðari hálfleiks þar sem þær pressuðu stíft að marki gestanna, en inn vildi boltinn ekki.

Það dró hins vegar til tíðinda á 68. mínútu þegar Dagný Brynjarsdóttir átti hörku skot sem fór efst í markstöngina á marki Þórs/KA en markamaskínan Kristín Ýr var fyrst til þess að átta sig og afgreiddi frákastið af yfirvegun og öryggi í markið og jafnaði leikinn.

En þetta var sautjánda markið hjá Kristínu Ýr í deildinni í sumar og er hún markahæst í deildinni eins og er.

Baráttuglaðar Norðanstúlkur höfðu varist vel fram að jöfnunarmarkinu en voru farnar að bakka full mikið og lentu fyrir vikið undir mikilli pressu frá Valsstúlkum.

Valsstúkur héldu pressunni áfram og það skall hurð nærri hælum þegar fimm mínútur lifðu leiks þegar varnarmenn gestanna björguðu á línu eftir skalla frá Katrínu Jónsdóttur.

Á síðustu mínútu venjulegs leiktíma fékk Dagný svo kjörið tækifæri til þess að tryggja Val sigur en skot hennar af stuttu færi sigldi framhjá marki Þórs/KA.

Gestirnir voru aftur á móti ekki hættir og Zver og Smiljkovic léku laglega í gegnum vörn Vals og Zver skoraði svo sigurmarkið í uppbótartíma og sitt annað mark í leiknum með skoti af stuttu færi.

Sannarlega ótrúlegur sigur Þórs/KA í dramatískum og kaflaskiptum leik þar sem gestirnir voru hættulegri í fyrri hálfleik en Valur í þeim seinni.

Þór/KA er á góðu skriði í deildinni og saxar jafnt og þétt á forskot toppliðanna en Norðanstúlkur hafa ekki tapað leik í deildinni síðan í 6. umferð eða í byrjun júní.

Valsstúlkur voru aftur á móti aðeins að tapa sínum öðrum leik í sumar en hitt tapið kom í 2. umferð Íslandsmótsins gegn Breiðabliki á Vodafonevellinum og þá kom sigurmark gestanna einnig í uppbótartíma.

Tölfræðin:

Valur - Þór/KA 1-2

0-1 Mateja Zver (45.)

1-1 Kristín Ýr Bjarnadóttir (68.)

1-2 Mateja Zver (90.+2)

Vodafonevöllurinn, áhorfendur; óuppgefið

Dómari: Pétur Guðmundsson

Skot (á mark): 19-13 (7-8)

Varin skot: María Björg 6 - Berglind 6

Horn: 7-6

Aukaspyrnur fengnar: 15-13

Rangstöður: 1-5

Valur (4-5-1)

María Björg Ágústsdóttir

Björg Ásta Þórðardóttir

Pála Marie Einarsdóttir

Sif Atladóttir

Thelma Björk Einarsdóttir

Dagný Brynjarsdóttir

Katrín Jónsdóttir

Dóra María Lárusdóttir

Laufey Ólafsdóttir

(76., Andrea Ýr Gústavsdóttir)

Rakel Logadóttir

Kristín Ýr Bjarnadóttir

Þór/KA (4-5-1)

Berglind Magnúsdóttir

Rakel Hinriksdóttir

Bojana Besic

Silvía Rán Sigurðardóttir

Inga Dís Júlíusdóttir

Rakel Hönnudóttir

Elva Friðjónsdóttir

Karen Nóadóttir

Anna Sif Ásgrímsdóttir

Vesna Smiljkovic

Mateja Zver