Íslenskir fjárfestar óska eftir greiðslustöðvun í Milwaukee

Íslenskir fjárfestar með SJ Properties Suites Buyco ehf. í broddi fylkingar hafa óskað eftir greiðslustöðvun hjá dómstóli í Milwauke, stærstu borg Wisconsin ríkis í Bandaríkjunum.

Greiðslustöðvunin er vegna hótelbyggingar sem Íslendingarnir hafa eytt 17 milljónum dollara, eða 2,1 milljarði kr. í að koma á laggirnar.

Frekar djúpt er á eigendum SJ Properties Suites Buyco ehf en í gegnum þrjú önnur eignarhaldsfélög er hægt að rekja eignarhaldið til Milestone.

Greiðslustöðvunin nær yfir byggingu fjárfestanna á 14 hæða hóteli með 126 íbúðum í miðbæ Milwaukee sem gengur undir nafninu Staybridge Suites. Í frétt um málið á vefsíðu Journal Sentinel segir að ósk um greiðslustöðvun, samhliða óskar um að umsjónarmaður verði skipaður yfir verkefnið, sé tilkomin til að reyna að klára byggingu hótelsins.

Staybridge Suites er íbúðahótel með lúxusíbúðum og verslunarkjarna á jarðhæðinni. Vinna við að byggja hótelið stöðvaðist í desember s.l. þegar samstarfsaðili Íslendinganna varð gjaldþrota.

Fyrr í ár höfðuðu Íslendingarnir höfðað mál gegn samstarfsaðilum sínum, sem eru Economou Partners í Park Ridge og Development Opportunity Corp. í Flórída, vegna þess að þeir höfðu notað hluta af fjármagni til hótelsins til þess að fjármagna annað verkefni í Flórída. Þar var um rúmlega 300.000 dollara að ræða eða tæplega 40 milljónir kr.

Lögmaður SJ Properties Suites Buyco ehf., Scott Halloin segir að Íslendingarnar séu reiðubúnir til að setja meira fjármagn í hótelbygginguna til að klára verkið.

Það flækir málið að Silverton bankinn í Atlanta hefur veitt yfir 13 milljón dollara lán til hótelbyggingarinnar. Bankinn er nú gjaldþrota en talsmaður hans segir að kostnaðaráætlanir við hótelbygginguna hafi verið of lágar samkvæmt gögnum sem lögð hafa verið fyrir dómstólinn í Milwaukee.

Í fyrrgreindi málsókn Íslendinganna kemur fram að þeir hafi fyrst komist að meintum undandrætti samstarfsaðila sinna þegar lán frá Silverton hafi gjaldfallið.