Vísbendingar um að það versta sé yfirstaðið í Bandaríkjunum

Ben S. Bernanke, seðlabankastjóri Bandaríkjanna, segir að margt bendi til þess að hagkerfi landsins sé að rétta úr kútnum. Þrátt fyrir það telur hann farsælast til lengri tíma litið, að viðhalda öflugri og varfærinni peningastefnu um óákveðinn tíma. Það er Bloomberg fréttaveitan sem greinir frá þessu í dag.

„Hraðinn í efnahagssamdrættinum virðist vera að hægja á sér og það all verulega," sagði Bernanke. Í máli hans kemur ennfremur fram að það sé mikill slaki í efnahagslífinu og lítill sem enginn verðbólguþrýstingur. „Peningastefna seðlabankans einblínir nú fyrst og fremst á að hlúa að endurreisn hagkerfisins," segir Bernanke.

Í augnablikinu er enginn verðbólguþrýstingur í landinu og meðal annars vegna þess, eru vextir í Bandaríkjunum mjög lágir. „Þegar vinnumarkaðurinn nær sér aftur á strik mun allt hagkerfið fylgja í kjölfarið," segir í máli seðlabankastjórans.

Þessar fréttir koma í kjölfarið á uppsveiflu á hlutabréfamörkuðum og góðum afkomum einstakra fyrirtækja. Eins og Vísir hefur greint frá skiluðu til að mynda JPMorgan og Goldman Sachs, metafkomum á öðrum ársfjórðungi.

Þær fréttir hafa meðal annars kynnt undir þær væntingar að versta niðursveifla í Bandaríkjunum í rúm fimmtíu ár sé senn á enda.

Sjá má grein Bloomberg hér.