Leynibónusar til Ikea-toppa og hagnaðurinn til skattaparadísa

Þetta kemur fram í grein í sænska blaðinu Veckans Affärer sem byggir upplýsingar sínar á ónefndum háttsettum starfsmanni Ikea og á bókinni „Sandheden on Ikea" sem nýlega kom út. Bókin er skrifuð af Johan Stenebo fyrrum persónulegum aðstoðarmanni Ingvar Kamprads stofnenda Ikea.

Í greininni er fjallað um hvernig hagnaði af rekstri Ikea er komið í lóg með leynilegum hætti en þar sem Ikea er fjölskyldufyrirtæki ber því engin skylda til að upplýsa um rekstur sinn.

Fram kemur að í jólaræðu til starfsfólksins mun Kamprads hafa greint frá rekstrinum þannig að hægt var að reikna út að hagnaður af Ikea árið 2005 hafi numið 25 milljörðum sænskra kr. eða um 450 milljarða kr.

Í bók Stenebo segir að Ikea fái 100 kr. í hagnað af hverjum 1.000 kr. sem fyrirtækið velti. Reikna má út að heildarvelta Ikea í fyrra hafi numið 3.800 milljörðum kr. Þar með hafi hagnaðurinn numið 380 milljörðum kr. sem sendar voru til Bresku Jómfrúareyja.

Heimildarmaður Veckans Affärer segir að 5-6 æðstu yfirmenn Ikea fái leynilega bónusa greidda inn á reikninga sem þeir eigi á Bresku Jómfrúareyjum og komist þannig hjá því að borga skatta af þessum bónusum. Heimildarmaðurinn kveðst hafa setið fjölda funda með yfirmönnunum þar sem gengið var frá þessum yfirfærslum sem og yfirfærslum á hagnaði Ikea í erlend skattaskjól.

Blaðið Smålandsposten ræddi um málið við Mikael Ohlsson nýráðinn forstjóra Ikea sem neitar því að hann fái annað greitt frá Ikea en umsamin laun sín. „Ég fæ enga bónusa," segir Ohlsson við Smålandsposten.

Ikea-fjölskyldan á stærsta einkasjóð heimsins en hann er skráður til heimilis í Hollandi. Sjóðurinn ber heitið Stiching Ingka Foundation og er regnhlífarsjóður fyrir fjölda annrra sjóða í eigu fjölskyldunnar. Tímaritið The Econmist fjallaði um sjóðinn árið 2006 og áætlaði að eignir hans þá næmu 36 milljörðum dollara eða um 4.400 milljörðum kr. The Economist taldi að sjóðurinn væri notaður til að komast hjá sköttum af hagnaðinum af Ikea og til að verja Ikea gegn óvinveittum yfirtökum annarra fjárfesta.