Írskir skattgreiðendur fá 16.000 milljarða reikning

Írskir skattgreiðendur verða að punga út 80 milljörðum punda eða um 16.000 milljörðum kr. til að bjarga bönkum landsins frá hruni. Þetta er upphæðin sem írsk stjórnvöld hafa ákveðið að greiða fyrir ónýt lán í bönkum landsins. Þessum lánum verður safnað saman í einn „slæman banka" sem verður fjármagnaður af ríkissjóði landsins.

Í frétt um málið í breska blaðinu The Times segir að írskir bankar séu að sligast undan slæmum lánum og með því að taka þann kaleik af þeim muni stjórnvöld gera bönkum kleyft að hefja útlánastarfsemi að nýju.

Hinn „slæmi banki" hefur hlotið nafnið National Assets Management Agency (Nama). Fram kemur í fréttinni að stjórnarandstaðan á Írlandi er andvíg þessum áformum stjórnvalda og vill frekar að bankarnir verði þjóðnýttir.

Nokkur verkalýðsfélög Írlands eru einnig mjög á móti þessum áformum. Í yfirlýsingu frá tveimur þeirra segir m.a. að gráðugir bankamenn hafi stofnað til þessara skulda en nú eigi að varpa þeim yfir á skattgreiðendur og henda skattgreiðendum þannig fyrir úlfa. Jafnframt séu stjórnvöld að spila gífurlegt áhættuspil með skattfé landsmanna með þessum áformum sínum.

Stjórnvöld telja aftur á móti að Nama sé besta leiðin til að koma hjólum atvinnulífsins á Írlandi í gang aftur. Ef slíkt verði ekki gert blasi ekkert annað við en langvarandi stöðnun eða samdráttur á Írlandi.

Írar eru tæplega sex milljónir talsins en það þýðir að tæpar

2,7 milljónir króna falla á hvern og einn landsmann vegna þessa. Samanborið við 1,9 milljón króna sem hvert mannsbarn hér á landi mun þurfa að reiða fram falli 600 milljarðaskuldbinding á ríkissjóð vegna Icesave.