Seldu 2000 Ronaldo-treyjur á fyrstu tveimur klukkutímunum

Real Madrid seldi 2000 treyjur merktar Cristiano Ronaldo á fyrstu tveimur klukkutímunum en þær væru settar í sölu í kjölfar kynningarhátíðar kappans á Santiago Bernabeu í gær.

Troðningurinn var það mikill í versluninni að óprúttnum gestum hennar tókst einnig að stela 300 treyjum til viðbótar. Í fyrstu var aðeins fimmtán hleypt inn í verslunina í einu en fljótlega var horfið frá því enda kaupæði stuðningsmanna Real engu líkt.

Hver treyja kostar 85 evrur eða fimmtán þúsund krónur íslenskar. Real-menn þurfa þó að selja talsvert fleiri skyrtur til viðbótar til að borga upp kaupverðið á Cristiano Ronaldo frá Manchester United. Real Madrid borgaði 96 milljónir evra fyrir Portúgalann.