Freyr: Það fór um mig þegar þær fengu dauðfæri í upphafi

Freyr Alexandersson, þjálfari kvennaliðs Vals, var kátur eftir að hafa horft upp á sínar stelpur tryggja sér sæti í bikarúrslitaleiknum með 3-0 sigri á Þór/KA á Vodafone-vellinum í dag.

„Þetta hefði getað verið knappara hjá okkur en 3-0 lítur vel út og þetta var nokkuð öruggt í lokin," sagði Freyr Alexandersson kátur í leikslok.

„Það fór um mig þegar þær fengu dauðfæri í upphafi leiks og ég held að það hafi farið um leikmennina líka. Spennustigið var sennilega of hátt í byrjun og þetta náði bara að sjokkera þær. Þær komust í gang í kjölfarið og ég var ánægður með þær eftir það," sagði Freyr.

„Þetta er búin að vera erfið en skemmtileg leið í bikarúrslitaleikinn. Nú erum við komin í úrslitaleikinn og ef við náum að klára hann þá getum við verið rosalega stolt að hafa farið þessa leið að titlinum þetta árið," sagði Freyr.

„Ég vildi að við myndum halda hreinu því ég veit að við skorum alltaf. Við skoruðum ekki síðast í bikarúrslitaleiknum 2008 þannig að það er orðið mjög langt síðan að við náðum ekki að skora," sagði Freyr.

Kristín Ýr BJarnadóttir skoraði öll þrjú mörk Vals þar af tvö þau fyrstu eftir glæsilegar fyrirgjafir frá Hallberu Guðnýju Gísladóttur.

„Hallbera er komin á allt annað plan miðað við leik sinn síðustu ár. Hún er að spila stórkostlega og Kristín Ýr er náttúrulega besti skallamaðurinn í Norður-Evrópu," segir Freyr sem mætti í fjölmiðlaviðtölin með ljósa hárkollu í tilefni af veðmálinu sem Hallbera "bjó" til.

Freyr sagði að það hefði verið málamiðlun en Hallbera vildi að hann myndi aflita hárið sitt víst að hún hafði náð því markmiði þeirra að skora tíu deildarmörk í sumar.

„Hallbera er með mikið sjálfstraust og kannski einum of mikið stundum en það er gott því það nýtist henni inn á vellinum," sagði Freyr.

„Það er mjög stór skref að vera komin í bikarúrslitaleikinn og þar skiptir engu máli hverjum maður mætir. Það er alltaf hörkuleikur og miklar tilfinningar og það verður rosalega gaman að spila 15. ágúst og við ætlum að njóta þess," sagði Freyr.