Ballesteros: Tiger getur unnið Masters

Spænska golfgoðsögnin, Seve Ballesteros, hefur tröllatrú á Tiger Woods fyrir Masters og segir að endurkoma hans séu bestu fréttir sem golfið hefur fengið lengi.

„Ég er afar ánægður að sjá Tiger koma aftur. Hann á mikla möguleika að vinna Masters," sagði Spánverjinn.

„Ef hann ákveður að taka þátt í mótinu þá er það vegna þess að hann telur sig eiga möguleika á að vinna mótið. Við vitum öll hvað hann getur og Augusta er langur völlur. Hann er vanur að slá langt og hann þekkir völlinn líka vel þannig að ég tel hann eiga mikla möguleika." 

Spánverjinn hefur átt í vandræðum með heilsuna síðustu ár og farið í fjórar aðgerðir síðan hann greindist með heilaæxli árið 2008.