Khedira fæst á tómbóluverði - Ekkert samband við Real Madrid

Stuttgart neitar þeim fregnum að Sami Khedira sé við það að ganga til liðs við Real Madrid. Khedira var sagður vera nálægt því að skrifa undir við spænska stórliðið.

Khedira spilaði eins og flestir Þjóðverjar frábærlega á HM en hann er 23 ára gamall.

"Það hefur ekkert samband verið á milli Real Madrid og Stuttgart," sagði talsmaður þýska félagsins.

Hann staðfesti að mikill áhugi væri á miðjumanninum sem verður samningslaus eftir næsta tímabil.

Kaupverðið á honum er því ekki hátt, aðeins um 10 milljónir evra.