Hæstiréttur hafnaði skattasnúningum Glitnis

Hæstiréttur hefur sýknað íslenska ríkið af kröfum Glitnis, en bankinn taldi að ríkisskattstjóri hefði með ólögmætum hætti úrskurðað um álagningu tekjuskattsálags vegna vantalinna tekna Framtaks Fjárfestingarbanka. Glitnir reyndi að spara sér nokkuð hundruð milljónir króna í skattgreiðslur með því að nýta yfirfæranlegt rekstrartap Framtaks til frádráttar skattskyldum tekjum sínum. Ríkisskattstjóri hafði áður hafnað sjónarmiðum Glitnis í úrskurði sem bankinn reyndi síðan að hnekkja fyrir dómstólum.

Forsaga málsins er að Glitnir, sem þá starfaði undir nafni Íslandsbanka, keypti Framtak Fjárfestingarbanka af Straumi Burðarási hinn 3. desember 2003. Í kjölfarið var gerð samrunaáætlun milli Glitnis og Framtaks og átti Glitnir að taka við öllum skuldbindingum Framtaks.

Glitnir lagði til grundvallar að allar eignir og skuldir Framtaks hefðu færst til Glitnis á svokölluðu bókfærðu veðri og hefði hann jafnframt nýtt yfirfæranlegt rekstrartap þess félags til frádráttar skattskyldum tekjum sínum. Í úrskurði ríkisskattstjóra frá 28. desember 2006 var þessum sjónarmiðum Glitnis hafnað og var miðað við að Framtak teldist hafa verið slitið án þess að um sameiningu við Glitni hefði verið að ræða. Af þeim sökum hefðu myndast hjá félaginu tekjur vegna söluhagnaðar á árinu 2004 sem svöruðu til mismunar á verðmæti eigna Framtaks kaupum Glitnis annars vega og skattalegu bókfærðu verði eignanna hins vegar, en frá þeirri fjárhæð kæmi til frádráttar yfirfæranlegt rekstrartap félagsins. Því var ákveðið að leggja 25 prósent á þær tekjur Framtaks sem ekki höfðu verið taldar fram. Þá var miðað við að yfirfæranlegt rekstrartap Framtaks kæmi að fullu til frádráttar við ákvörðun tekjuskatta Framtaks og gæti ekki flust yfir til Glitnis. Með þessu hækkaði tekjuskattstofn Glitnis auk þess sem ríkisskattstjóri ákvað að bæta 25 prósent álagi við álagða skatta. Með þessu hækkuðu skattar Glitnis um tæplega 590 milljónir króna sem bankinn greiddi með fyrirvara, en Glitnir höfðaði mál til að hnekkja úrskurði ríkisskattstjóra.

Hæstiréttur hafnaði því að ríkisskattstjóri hefði ranglega beint meðferð máls um endurákvörðun tekjuskatts Framtaks að Glitni og að óheimilt hefði verið að leggja á Glitni tekjuskatt sem Framtak átti að greiða.

Þá féllst Hæstiréttur ekki á að neinar gallar hefðu verið á málsmeðferð ríkisskattstjóra sem gætu valdið ógildingu úrskurðarins. Þótti sýnt fram á að Glitni hefði ákveðið að sameinast Framtaki áður en hann keypti alla hluti í félaginu gegn greiðslu. Af þessum sökum var ekki talið að fullnægt væri skilyrðum laga til að haga skattskilum Glitnis og Framtaks vegna tekna á árinu 2004 á annan veg en mælt var fyrir um í úrskurði ríkisskattstjóra. Íslenska ríkið var því sýknað af kröfum Glitnis.