Tinna Íslandsmeistari í golfi í fyrsta skipti

Tinna Jóhannsdóttir úr Golfklúbbnum Keili er nýr Íslandsmeistari í golfi en hún fylgdi eftir góðum þriðja hring hjá sér og tryggði sér Íslandsmeistaratitilinn í fyrsta sinn með flottum lokahring á Íslandsmótinu í höggleik í Kiðjabergi í dag.

Tinna lék lokahringinn á sex höggum yfir pari en hún fór þriðja hringinn á parinu í gær. Tinna lék alls holurnar 72 á 22 höggum yfir pari og vann mótið með tveggja högga mun.

Hin 17 ára Ólafía Þórunn Kristinsdóttir úr GR var með eins högg forustu eftir fyrstu þrjá daga mótsins en hún gaf eftir á síðustu níu holunum og varð að sætta sig við annað sætið. Signý Arnórsdóttir úr GK endaði í 3. sætinu einu höggi á eftir Ólafíu sem lék á 25 höggum yfir pari á mótinu.

Lokahringurinn var æsispennandi en þær Tinna, Ólafía og Signý Arnórsdóttir voru sem dæmi allar jafnar eftir fyrstu níu holur dagsins. Þær töpuðu allar þremur höggum á 10. til 12. holu en Tinna náði síðan tveggja högga forustu með því að ná pari á 13. og 14. holu á meðan hinar tvær fengu skolla á báðum þessum holum.

Tinna hélt tveggja stiga forskoti fram að 17. holu þegar Ólafía Þórunn fékk fugl og Tinna tapaði einu höggi. Það þýddi að þær voru jafnar fyrir lokaholuna og Signý aðeins einu höggi á eftir.

Tinna átti frábært teighögg á 18. holunni og lagði með því grunninn að sigrinum. Ólafía lenti hinsvegar í glompu og síðan í vandræðum eftir það. Tinna fékk að lokum fugl á 18. holunni og vann mótið því með tveggja högga mun.

Lokastaða efstu kvenna á Íslandsmótinu í höggleik 2010:

1. Tinna Jóhannsdóttir, GK +22

2. Ólafía Þórunn Kristinsdóttir, GR  +24     

3. Signý Arnórsdóttir, GK   +25

4. Valdís Þóra Jónsdóttir, GL +27

4. Nína Björk Geirsdóttir, GKj +27

6. Berglind Björnsdóttir, GR +35

7. Þórdís Geirsdóttir, GK +42

8. Helena Árnadóttir, GR +45

9. Hildur Kristín Þorvarðardóttir, GR +47

10. Eygló Myrra Óskarsdóttir, GO +49

10. Karlotta Einarsdóttir, NK +49

10. Ingunn Gunnarsdóttir, GKG +49