Kanadískt rækjustríð eykur landanir í Reykjavík

Fjallað er um málið í blaðinu Politiken. Þar kemur fram að Gail Shea sjávarútvegsráðherra Kanada sakar grænlenska og færeyska rækjusjómenn um ofveiði á rækju úti fyrir ströndum landsins. Því verði gripið til framangreindra aðgerða.

Í raun hafa Grænlendingar og Færeyingar ákveðið einhliða að taka sér 3.100 tonna rækjukvóta á alþjóðlegu hafsvæði undan ströndum Kanada. Hinsvegar vilja kanadísk stjórnvöld að þessi kvóti verði í mesta lagi 334 tonn. Samningar milli þjóðanna um málið innan Nafo hafa engu skilað.

Þótt bæði Grænlendingar og Færeyingar sigla skipum sínum undir dönskum fánum hafa dönsk stjórnvöld hingað til farið með veggjum í málinu. Danir hafa látið það alfarið í hendur Grænlendinga og Færeyinga að semja um kvótann. Þetta er ekki í fyrsta sinn sem kanadískum höfnum er lokað fyrir skipum þessara þjóða. Hafnirnar voru lokaðar árin 2004 til 2008.

Í Politiken segir að hafnarbannið muni ekki hafa nein áhrif á grænlenska rækjuflotann enda stutt fyrir hann í heimahöfn. Færeyingar þurfi hinsvegar að sigla með afla sinn til Reykjavíkur eða jafnvel enn lengra til Þórhafar í Færeyjum.

Fram kemur í fréttinni að hafnarbannið komi einna verst við smábæi meðfram strönd Kanada. Ekki aðeins stöðvast landanir þar heldur missa þessir bæir talsverð viðskipti með olíu og vistir fyrir rækjuskipin.