Henti kókaíni á harðahlaupum

Maður á fertugsaldri var handtekinn í Árbæ þegar hann reyndi að flýja á hlaupum og henti frá sér fíkniefnum sem reyndust vera kókaín.

Þetta var eitt af mörgum fíkniefnamálum sem komu á borð lögreglu um helgina. Í íbúð manns sem var handtekinn í miðborginni fundust kannabisplöntur og amfetamín.

Þá hafði lögregla afskipti af fjórum mönnum í miðborginni, sem allir voru með fíkniefni í fórum sínum, ýmist marijúana eða amfetamín.

Kona var handtekin með marijúana í Kringlunni og fjórir karlmenn með kannabisefni víðs vegar á höfuðborgarsvæðinu. - jss