Íhuga að krefja fyrrverandi stjórnendur Baugs um skaðabætur

Þrotabú Baugs íhugar að krefja fyrrverandi stjórnendur Baugs um skaðabætur sem geta numið allt að 15 milljörðum króna vegna vanrækslu í starfi. Stjórnin keypti hlutabréf fyrir þá upphæð af þremur stærstu hluthöfum Baugs þegar markaðurinn fyrir bréfin var lítill sem enginn. Sex af sjö stjórnarmönnum Baugs tengdust hluthöfunum þremur.

Fresturinn til að höfða riftunarmál rann út hjá þrotabúi Baugs á föstudag. Alls hafa fjögur mál verið höfðuð upp á rúma 20 milljarða króna. Fresturinn til að höfða skaðabótamál gegn stjórnendum fyrirtækisins rennur hins vegar ekki út fyrr en í lok árs. Samkvæmt heimildum mun það vera til skoðunar að hefja skaðabótamál gegn fyrrverandi stjórnendum Baugs. Samkvæmt hlutafélagalögum eru stjórnarmenn og framkvæmdastjórar skyldir til að bæta hlutafélagi það tjón sem þeir hafa valdið því í störfum sínum. Þegar Hagar voru seldir úr Baugi til eignarhaldsfélagsins 1998 ehf sumarið 2008 fóru 15 milljarðar af söluandvirðinu í hlutabréfakaup Baugs í Baugi. Bréfin voru keypt af félögum í eigu þriggja stærstu hluthafanna; Jóni Ásgeiri Jóhannessyni, Ingibjörgu Pálmadóttur og Hreini Loftssyni. Allir þessir aðilar áttu sæti í stjórn Baugs á þessum tíma en þeirra að auki voru Jóhannes Jónsson, Kristín Jóhannesdóttir, Guðrún Sylvía Pétursdóttir og Hans Kristian Hustad einnig stjórnarmenn.

Þrotabúið skoðar nú hvort að stjórnin hafi ákveðið að kaupa nánast verðlaus hlutabréf af stærstu eigendum þess á yfirverði. Skaðabótakrafan getur numið allt að fimmtán milljörðum króna, þ.e. ef bréfin verða metin verðlaus þegar kaupin áttu sér stað.

Allir í stjórninni tengdust félögunum þremur, að undanskildum Hans Kristian. Spurningin hlýtur því að vera sú hverra hagsmuna var stjórnin að gæta þegar hún ákvað að kaupa hlutabréf af félögum í eigu nær allra stjórnarmanna?

Samkvæmt heimildum mun skaðabótakrafan á einstaka stjórnarmenn og stjórnendur ráðast af því hversu mikinn fjárhagslegan ávinning þeir höfðu af gjörningnum.

Ekki náðist í Hrein né Jón Ásgeir en haft hefur verið eftir honum að það hafi verið helstu kröfuhafar Baugs sem hafi krafist þess að söluandvirðinu var ráðstafað eins og gert var.