Að gera konfekt heima er orðið ómissandi hluti af jólaundirbúningi margra.
Halldór Kr. Sigurðsson hefur haldið námskeið í konfektgerð víða um land. Í ár verður hann með námskeið í Hagkaupum. Hér sýnir hann lesendum hvernig steypa á í súkkulaðimót og gefur uppskriftir að þremur góðum fyllingum.
Fyllingar í konfektmolana
Fylling 1
100 g Hagversmöndlur
150 g núggat
50 g Svansö-hunang
Smyrjið möndlur með hunangi. Setjið á pappír inn í ofn á bökunarplötu og ristið við 200°C í 5-10 mín. Takið möndlurnar svo út og látið kólna. Myljið þetta síðan fínt með kökukefli og blandið þar á eftir við núggatið, látið harðna í kæli.
Fylling 2
100 g karamellu Nizza
60 g rjómi
Bræðið karamellu Nizza í potti eða örbylgju, sjóðið rjómann, hellið honum síðan yfir bræddu karamelluna í smá skömmtum, látið samlagast vel, kælið.
Fylling 3
marsipan
Grand Marnier
núggat og kasjúhnetur
flórsykur
Hægt er að blanda marsipani við ýmislegt til dæmis núggat og kasjúhnetur, flórsykur og líkjör (til dæmis Grand Marnier).
1.
Bræðið súkkulaðihjúp yfir vatnsbaði. Ef skreyta á molana er gott að bræða líka hvítt súkkulaði og sprauta fyrst yfir formin með því.
2.
Hellið bræddum súkkulaðihjúpnum í formið.
3.
Síðan er súkkulaðinu hellt af og formið sett inn í kæli og tekið út eftir 5-10 mín, eða þegar súkkulaðið er harðnað í forminu.
4.
Fyllingin sett inn í. Síðan er súkkulaðinu hellt aftur yfir og formið síðan hrist vel til að engar loftbólur leynist í því.
5.
Súkkulaðið skafið af og formið sett aftur inn í kæli í 10-20 mín eða þangað til súkkulaðið er orðið hart.
6.
Síðan eru molarnir losaðir úr forminu.
7.
Þá eru girnilegir konfektmolarnir tilbúnir til átu.
