Greining Arion banka spáir 75-100 punkta vaxtalækkun

Fjallað er um málið í Markaðspunktum greiningarinnar. Þar segir að nú virðast fylgismenn hárra vaxta eiga undir högg að sækja þar sem fá rök eru til að bakka upp enga eða hóflega vaxtalækkun. Ber þar helst að nefna að gengi krónunnar hefur verið afar stöðugt frá síðasta vaxtaákvörðunarfundi og verðbólga hefur lækkað langt umfram spár Seðlabankans frá því í Peningamálum í nóvember.

„Hugsanlega væri hægt að tína fram rök er tengjast IceSave eða hækkandi skuldatryggingarálagi en slíkt myndi stinga í stúf við fyrri ummæli seðlabankastjóra. Þótt afstaða Seðlabankastjóra hafi legið fyrir í síðustu viku, þegar hann lýsti því yfir í viðtali hjá Bloomberg fréttaveitunni að svigrúm væri til frekari vaxtalækkunar, þá hefur óvissan einkum legið í ákvörðun annarra nefndarmanna sem er skipuð af fimm mönnum þar sem meirihlutinn ræður," segir í Markaðspunktunum.

„Nýjustu verðmælingar Hagstofunnar ýta undir þá trú okkar að meirihlutinn muni kjósa vaxtalækkun, spurning er því sú hversu mikla lækkun Seðlabankinn mun þora að leggja í. Miðað við síðustu vaxtaákvörðunarfundi þá hefur Seðlabankinn þó heldur verið á skjön við markaðsaðila, þ.e. til meiri lækkunar en talið hefur verið fyrirfram."

Ennfremur segir greiningin að Seðlabankinn hefur að undanförnu gefið til kynna að þeir vilji hafa vexti í námunda við tólf mánaða verðbólgu og halda þannig jákvæðu raunvaxtarstigi, nú síðast í viðtalinu hjá Bloomberg gaf seðlabankstjóri í skyn að vaxtalækkun væri nauðsynleg til að koma í veg fyrir hækkun raunstýrivaxta.

„Skattaleiðrétt verðbólga var í desember 6,9% á sama tíma og innlánsvextir voru 8,5%. Í dag er skattaleiðrétta verðbólgan hinsvegar komin í 5,2% - verði þetta viðmið Seðlabankans á morgun gæti hann lækkað vexti um 150 punkta.

Hins vegar teljum við að sú óvissa sem nú er komin upp vegna synjunar á Icesave lögunum ásamt því sem endurskoðun á sameiginlegri áætlun stjórnvalda og AGS hafi verið frestað að nefndarmenn kjósi að lækka vextir hægar en ella. Við teljum því líklegra að vaxtalækkunin feli í sér 75-100 punkta lækkun að þessu sinni," segir í Markaðspunktunum.