Teitur: Getum gert miklu betur

„Það er alltaf sárt að tapa,“ sagði Teitur Örlygsson, þjálfari Stjörnunnar, eftir að Grindavík vann í kvöld fyrsta leikinn í rimmu liðanna í úrslitakeppni Iceland Express-deild karla í kvöld.

„Ég er auðvitað hundfúll því að við spiluðum ekki nógu vel í kvöld. Við getum bætt okkar leik á mörgum sviðum og nú fáum við tvo daga til að gera það áður en næsti leikur kemur,“ bætti hann við.

„Við vorum aðeins á hælunum í varnarleiknum í kvöld og vorum að klikka á ákveðnum færslum sem gerði það að verkum að þeir fengu galopin skot fyrir utan þriggja stiga línuna. Þeir voru duglegir að nýta sér það og skoruðu átján stig þaðan bara í fyrsta leikhlutanum.“

„Þá vorum við strax byrjaðir að elta og það dró tennurnar aðeins úr okkur. Þetta gaf þeim sjálfstraust. Við náðum þó að halda í við þá þó svo að við hefðum ekki verið að spila vel. Það er kannski það eina sem manni líður vel yfir - að vita að við getum gert svo miklu betur þegar við mætum þeim heima á sunnudaginn.“