Löw verður áfram með þýska landsliðið

Joachim Löw hefur framlengt samningi sínum við þýska knattspyrnusambandið fram til loka ársins 2014 og mun hann því stjórna liðinu á næsta HM sem fram fer í Brasilíu.

Löw hefur náð fínum árangri með þýska karlalandsliðið í fótbolta en liðið lék til úrslita á EM 2008 og komst í undanúrslit á HM 2010. Í undankeppni EM 2012 hefur liðið unnið alla fjóra leiki sína en næsta verkefni er gegn Kasakstan þann 26. mars.

Það eru því allar líkur á því að Þjóðverjar verði í úrslitum EM sem verða í Póllandi og Úkraínu árið 2012.

Löw er 51 árs gamall og hann hóf þjálfaraferilinn hjá Stuttgart 1996-1998. Þaðan fór hann til Fenerbache í Tyrklandi 1998-1999. Hann var þjálfaði ýmis lið á árunum 2000-2004 en hann gerðist aðstoðarþjálfari landsliðsins árið 2004 og tók við sem aðalþjálfari árið 2006.