Hörður Axel: Nú er öll pressan á KR

Hörður Axel Vilhjálmsson setti niður tvær rosalega mikilvægar þriggja stiga körfur í framlengingunni í 104-103 sigri Keflavíkur á KR í kvöld. Keflavík vann þar sinn annan leik í röð í framlengingu og tryggði sér oddaleik á fimmtudagskvöldið. Hörður Axel endaði leikinn með 16 stig og 7 stoðsendingar.

„Þetta eru svaka leikir og svaka lið. Þetta eru það jöfn lið að við erum búnir að fara í tvær framlengingar í röð á móti þeim. Við lentum sex stigum undir í framlengingunni en komum til baka og það hlýtur að sýna karakter. Við erum með hörkulið og við hættum aldrei sama hver staðan er," sagði Hörður Axel sem var með 16 stig og 7 stoðsendingar í kvöld.

„Þetta leit ekki vel út en eina liðið sem hefur gert þetta áður er Keflavík og við hættum ekki fyrr en það er búið að vinna þrjá leiki," sagði Hörður sem getur ekki beðið eftir næsta leik.

„Nú er öll pressan á KR, þeir voru 2-0 yfir og vilja ekki tapa þessu 3-2. Ég get ekki beðið eftir þessum leik og vil helst fara að spila hann núna," sagði Hörður Axel.