Brynjar um Walker: Stórkostlegur

„Hann er stórkostlegur og það var ótrúlegt að fylgjast með því hvernig honum óx ásmegin eftir því sem leið á tímabilið."

Þannig lýsir Brynjar Þór Björnsson liðfélaga sínum, Marcus Walker, sem í kvöld var valinn verðmætasti leikmaður úrslitakeppninnar eftir að KR tryggði sér Íslandsmeistaratitilinn í körfubolta.

„Hann var rólegur fyrir áramót en ég hef varla séð aðra eins frammistöðu hjá útlendingi eftir áramót. Hann talaði mikið um að vörnin hafi verið aðalatriðið þegar hann kom en hann hefur einnig sýnt að hann er stórkostlegur sóknarmaður."

„Hann setti niður tvo þrista í röð í þriðja leikhluta sem í raun kláraði leikinn fyrir okkur. Það segir ótrúlega margt um hann. Þetta var algjörlega fáránlegt."