Prentuðu þrjá milljarða frímerkja með rangri mynd

Í ljós hefur komið að bandaríska póstþjónustan lét prent þrjá milljarða frímerkja með rangri mynd á.

Um er að ræða nýtt 44 senta frímerki með mynd af andliti Frelsisstyttunnar. Skömmu eftir að frímerkið fór í umferð tók glöggur frímerkjasafnari eftir því að andlitsmyndin var ekki af Frelsisstyttunni sem stendur við innsiglinguna í New York höfn. Um er að ræða mynd af eftirlíkingu styttunnar sem stendur fyrir utan New York Hotel & Casino í Las Vegas.

Póstþjónustan hefur staðfest mistökin. Ljósmyndastofan sem myndin var keypt frá sendi ranga mynd til prentunnar. Það er hinsvegar ekki ætlunin að innkalla frímerkin. Póstþjónutan segir að á frímerkinu standi Frelsisstyttan. Þar sé hinsvegar ekkert sagt um hvaða styttu sé að ræða.

Íbúar Las Vegas munu vera brosmildir yfir þessu öllu og nokkuð ánægðir með að þeirra stytta er á frímerkinu.