Vinna bara á oddaárunum eins og San Antonio Spurs

KR-ingar tryggðu sér Íslandsmeistaratitilinn í Iceland Express deild karla í gær með því að vinna fjórða leikinn í úrslitaeinvígi sínu á móti Stjörnunni. Þetta er í þriðja sinn frá og með árinu 2007 sem Fannar Ólafsson, fyrirliði KR, lyfti Íslandsbikarnum glæsilega en líkt og hjá NBA-liðinu San Antonio Spurs þá hafa KR-ingar bara unnið titilinn á oddaárum síðan að Fannar kom í Vesturbæinn.

San Antonio Spurs hefur orðið fjórum sinnum NBA-meistari með Tim Duncan innanborðs og allir fjórir titlarnir hafa komið á oddaárum. Spurs hefur unnið titilinn í öll skiptin sem liðið hefur komist alla leið í úrslitaeinvígið.

Fannar Ólafsson kom til KR árið 2005-2006 og líkt og hjá Duncan varð hann meistari á sínu öðru ári með félaginu. Duncan spilaði sitt fyrsta tímabil 1997-98 og vann sinn fyrsta titil árið eftir. KR-ingar hafa unnið titilinn í öll skiptin sem liðið hefur komist alla leið í úrslitaeinvígið með Fannar innanborðs.

KR-ingar hafa ekki komist í lokaúrslitin á sléttu ári síðan að þeir unnu titilinn árið 2000. 2002, 2006 og 2010 töpuðu þeir fyrir verðandi meisurum í undanúrslitunum og 2004 og 2008 duttu þeir út í fyrstu umferð.





Svart-hvítir og vinna bara á oddaárunum

Meistaratitlar San Antonio Spurs með Tim Duncan

1999 Vann New York Knicks 4-1 í úrslitunum

2003 Vann New Jersey Nets 4-2 í úrslitunum

2005 Vann Detroit Pistons 4-3 í úrslitunum

2007 Vann Cleveland Cavaliers 4-0 í úrslitunum

- hafa aldrei tapað í lokaúrslitum með Duncan



Meistaratitlar KR með Fannar Ólafsson

2007 Vann Njarðvík 3-1 í úrslitunum

2009 Vann Grindavík 3-2 í úrslitunum

2011 Vann Stjörnuna 3-1 í úrslitunum

- hafa aldrei tapað í lokaúrslitum með Fannar