Actavis opnar formlega nýjar höfuðstöðvar í Sviss

Actavis opnaði formlega í dag nýjar skrifstofur framkvæmdastjórnar fyrirtækisins í Zug í Sviss. Nú þegar eru um 100 manns, frá 29 löndum, komin til starfa. Við lok annars ársfjórðungs er gert ráð fyrir því að allar sex hæðir nýju höfuðstöðvanna, verði skipaðar starfsmönnum Actavis, samtals um 150 manns. Þar af eru rúmlega 20 frá Íslandi.

Í tilkynningu segir að við opnunina kom fram í máli forstjóra Actavis, Claudios Albrechts að gera mætti ráð fyrir miklum breytingum á næstunni í framleiðslu á samheitalyfjum. Þeir sem greiddu fyrir vöruna gerðu sífellt meiri kröfur. Og því þyrfti þessi geiri að breytast umtalsvert.

Actavis þyrfti að bjóða sífellt betri lausnir og vera þannig á undan samkeppnisaðilum. Nýju slagorði fyrirtækisins „think smarter medicine“, er ætlað að vera lýsandi fyrir þessa viðleitni. Þá sé ljóst að skilin á milli hefðbundinna lyfjaframleiðenda og samheitalyfjafyrirtækja séu sífellt að minnka. Og reikna megi með því að samheitalyfjafyrirtæki eins og þau eru í dag, verði sjaldséð eftir tíu ár.

Claudio Albrecht segir staðsetningu Actavis í miðri Evrópu vera mjög hentunga fyrir margra hluta sakir. Sviss sé miðsvæðis, umhverfi fyrir fyrirtækjarekstur sé hentugt og gott að fá fólk með alþjóðlega reynslu til starfa þar. Fleiri staðir en Sviss voru einnig kannaðir áður en ákveðið var að setja skrifstofurnar niður í Sviss. Þar má nefna: Kaupmannahöfn, London og Amsterdam.