Segist ekki skulda yfir 20 milljarða: Spunameistarar beita öllum ráðum

„Við erum að sjá enn eitt dæmi þess að spunameistarar Björgólfs beita öllum ráðum í uppgjöri hans við íslenskt samfélag og ég undrast að talsmaður Björgólfs telji sig hafa upplýsingar um persónulegar ábyrgðir Róberts," segir Árni Harðarson, lögmaður Róberts Wessman, um fullyrðingu talsmanns Björgólfs Thors , um að Róbert skuldi persónulega yfir 20 milljarða króna. Hann vísar þessu alfarið á bug en Ragnhildur Sverrisdóttir fullyrðir þetta í viðtali við Vísi í morgun.

Róbert stefndi félögunum Novator Pharma Holding, sem er skrásett á Tortóla, og Novator Pharma í ágúst á síðasta ári. Ástæðan var sú að hann taldi sig eiga inni 30 milljónir evra, eða um 4,6 milljarða króna, vegna árangurstengdrar þóknunar. En Róbert var forstjóri Actavis, áður Delta, í tæp tíu ár. Félögin kröfðust þess að málinu yrði vísað frá og féllst Héraðsdómur Reykjavíkur á það í gær.

Árni sagði í gær, þegar leitað var viðbragða við frávísuninni, að hann hefði áhyggjur af drætti málsins þar sem hann óttaðist að félög Björgólfs sem stefnt var í málinu, færu í þrot áður en efnisdómur fengist fyrir dómstólum, þar sem búið væri að færa eignarhaldið á Actavis í annað félag í eigu Björgólfs.

„Við höfum eðlilega áhyggjur af greiðslugetu félaga Björgólfs enda hefur hann og félögin sjálf skriflega lýst því yfir að eigið fé í Novator, félagi hans, sem við höfum stefnt geti ekki staðið við sínar skuldbindingar," segir Árni en Vísir hefur undir höndum póst frá Björgólfi til Róberts þar sem Björgólfur skrifar meðal annars orðrétt:

„Eins og þú veist og rætt hefur verið á fundum með þér og fulltrúum þínum þá eiga sér stað viðræður á milli Actavis og DB um endurskipulagningu skulda félagsins. Eins og staðan er í dag þá er fyrirtækið yfir skuldsett og getur ekki staðið undir greiðslum á þeim lánum sem hvíla á félaginu. Þá er einnig ljóst að fjárhæð skulda er verulega umfram verðmæti félagsins og því ekkert eigið fé er eftir í strúktúrnum, þ.m.t. í Novator Pharma sárl (þar sem þú ert hluthafi) og Novator Pharma Holding Limited".

Þess ber að geta að pósturinn var sendur í september 2009, eða um ári áður en Björgólfur samdi við kröfuhafa sína.

En Árni áréttar ótta sinn vegna póstsins og segir: „Hann hefur komið verðmætustu eign sinni í Actavis Group í skjól og fært eignarhaldið til Tortóla í gegnum nokkur eignarhaldsfélög."

Árni nefnir Actavis sérstaklega því eignarhald Björgólfs á félaginu er grundvöllur skuldauppgjörs hans samkvæmt tilkynningu frá Björgólfi um málið á síðasta ári.

Um skuldir Róberts segir Árni að fullyrðingar Ragnhildar séu einfaldlega rangar, „og virðast settar fram til þess eins að verjast umræðu um slæma stöðu félaga Björgólfs," bætir hann við.

Spurður um stöðu Róberts segir Árni: „Björgólfur Thor eða talskona hans þurfa ekki að hafa áhyggjur af því að Róbert geri ekki upp skuldir sínar. Ljóst er að krafa Róberts á hendur félaga í eigu Björgólfs mun vel duga fyrir uppgjöri á skuldum hans."