Öskuskýið lengir flugferðir milli Evrópu og Bandaríkjanna

Öskuskýið frá Grímsvötnum hefur þegar truflandi áhrif á flug milli norðurhluta Evrópu og Bandaríkjanna. Þannig segir Mikkel Thrane fjölmiðlafulltrúi SAS að farþegar þeirra sem ætla að fljúga frá Kaupmannahöfn til Bandaríkjanna megi gera ráð fyrir að flugið taki klukkutíma lengur en venjulega. Þetta er sökum þess að flugvélar SAS verða að taka á sig krók suður fyrir öskuskýið.

Þetta kemur fram í frétt á börsen.dk um málið. Þar segir að í fyrstu verði áhrifin af gosinu í Grímsvötnum minniháttar í Danmörku og er allt loftrými landsins opið. Dönsk flugmálayfirvöld fylgjast þó grannt með þróun gossins.

Þá segir í börsen að ferðamannageirinn í Danmörku hafi áhyggjur af gosinu. Stig Elling forstjóri Star Tours segir að gosið hafi komið á versta hugsanlega tíma. Hann nefnir að nú séu þrefalt fleiri flugvélar á flugi með ferðamenn en var þegar Eyjafjallajökull gaus í fyrra.