Hefja aftur við­ræður við Paramount

Stjórn WBD lýsti því yfir undir lok síðasta árs að til stæði að skipta félaginu upp í tvo hluta. Upptökuver fyrir bæði kvikmyndir og sjónvarpsþætti og HBO Max streymisveita félagsins yrðu í einum og sjónvarpsstöðvar eins og Discovery, CNN, TNT og fleiri yrðu reknar áfram í sér félagi.

Netflix gerði tilboð í upptökuverin og HBO Max en ekki í sjónvarpsstöðvarnar. Tilboðið hljómaði upp á 72 milljarða dala og var það samþykkt af stjórninni. Það samsvarar um 8,8 billjónum króna (tólf núll) á gengi dagsins í dag.

Í tilkynningu frá stjórn WBD segir að forsvarsmenn Netflix hafi gefið stjórn WBD sjö daga til að ræða við Paramount um nýja tilboðið. Stjórnin er enn samþykk því að selja til Netflix en með þessum viðræðum næstu daga vill stjórnin útkljá málið að fullnustu.

Forsvarsmenn Netflix telja að tilboð þeirra sé enn það hagkvæmasta fyrir eigendur WBD.

Eigendur Paramount hafa gert fleiri tilboð í WBD og vilja þeir allan reksturinn, sjónvarpsstöðvarnar, upptökuverin og HBO Max.

Paramount hafði reynt svokallaða fjandsamlega yfirtöku en í einföldu máli sagt felur slíkt í sér að fara fram hjá stjórn WBD og kaupa hlutabréf í félaginu beint af hluthöfum. Þannig gæti Paramount náð meirihluta í WBD og skipað sitt fólk í nýja stjórn. Þetta ferli er þó töluvert flókið og sagði stjórn WBD hluthöfum að hafna tilboðinu.

Eins og áður segir hefur stjórnin þegar samþykkt kauptilboð frá Netflix og felur það meðal annars í sér að komi önnur tilboð hafi Netflix rétt til að jafna öll önnur tilboð.

Nýjasta tilboð Paramount til hluthafa felur meðal annars í sér að greiða þá 2,8 milljarða dala sem það myndi kosta að rifta samkomulaginu við Netflix, samkvæmt frétt Wall Street Journal. Þá segja heimildarmenn miðilsins að hluthafar í WBD búist við því að tilboð Paramount muni vera um 32 eða 33 dalir á hlut.

Fyrra yfirtökutilboðið var um þrjátíu dalir á hlut.

Forstjóri Paramount fundaði með Trump

Forsvarsmenn Paramount Skydance telja sig í bestri stöðu til að fá samrunann samþykktan en fyrirtækið var nýlega myndað úr samruna fyrirtækjanna Paramount og Skydance, eftir að Paramount greiddi Trump bætur vegna viðtals fréttaskýringarþáttarins 60 mínútna við Harris í aðdraganda kosninganna.

Þá er markaðsstaða Paramount verri en staða bæði Netflix og WBD. David Ellison, forstjóri Paramount og sonur auðjöfursins Larry Ellison, fundaði nýverið með Donald Trump, forseta Bandaríkjanna. Nokkrum dögum síðar sagðist Trump ekki koma með nokkrum hætti að málinu.

Hann hafði áður sagt að hann myndi taka virkan þátt í því að taka ákvörðun um það hvort yfirvöld Bandaríkjanna myndu samþykkja kaupin.