Jarðboranir gera risasasamning

Jarðboranir hafa samið við eitt stærsta orkufyrirtæki Nýja-Sjálands, Mighty River Power, um framkvæmdir þar í landi. Samningurinn, sem er að verðmæti um 3 milljarðar króna, verður undirritaður síðar í mánuðinum.

Í tilkynningu frá Jarðborunum segir að verkefnið felist í borunum eftir jarðhita á svonefndu Ngatamariki jarðhitasvæði sem er um 17 km norðaustur af stöðuvatninu Taupo, um miðbik nyrðri eyju Nýja-Sjálands. „Jarðhitinn verður nýttur til raforkuframleiðslu í nýju orkuveri á svæðinu sem verður í upphafi 82 MW og síðar stækkað í áföngum. Samningurinn er að lágmarki til tveggja ára og verður Týr, sem er stærsti bor landsins, fluttur yfir hálfan hnöttinn til verkefnisins. Gert er ráð fyrir að á fjórða tug sérfræðinga Jarðborana fari utan til að vinna við framkvæmdirnar og undirbúning þeirra.“

Bent S. Einarsson, forstjóri Jarðborana segir samninginn afar ánægjulegan enda sé um að ræða stærsta og metnaðarfyllsta verkefni sem fyrirtækið hafi ráðist í erlendis. „Jarðboranir urðu hlutskarpastar í alþjóðlegu útboði sem fjöldi borverktaka tók þátt í. Mighty River Power gerði í útboðinu kröfur um tæknilega þekkingu og alþjóðlega vottun á sviði umhverfis og öryggismála, auk þess sem reynsla af viðlíka verkefnum var skilyrði. Við stóðumst þessar kröfur og höfum fundið fyrir því að Jarðboranir njóta trausts á alþjóðlegum bormarkaði, ekki síst vegna áratuga reynslu fyrirtækisins af jarðhitaframkvæmdum á Íslandi og víðar."

Framkvæmdirnar á Nýja-Sjálandi styrkja verkefnastöðu Jarðborana og munu skipta miklu við enn frekari uppbyggingu á alþjóðlegri starfsemi félagsins enda er Nýja-Sjáland afar áhugaverður markaður. „Við höfum unnið að markaðssetningu á Nýja-Sjálandi í nokkurn tíma og nú er það framtak að skila árangri. Nýsjálendingar leggja vaxandi áherslu á að auka hlutdeild endurnýjanlegrar orku í landinu enda er þeim ljóst hve jarðvarminn er hagkvæmur og vistvænn orkugjafi. Nýsjálendingar eru nú þegar meðal fremstu þjóða heims á þessu sviði og eru ákveðnir í því að ná enn lengra."

Mark Trigg, framkvæmdastjóri viðskipaþróunar hjá Mighty River Power segir að þeim þyki mikill akkur í að fá hingað til lands borfyrirtæki frá Íslandi sem hafi mikla reynslu af jarðhitaborunum, auk þess sem þeir flytji til landsins nýja kynslóð af tækjabúnaði sem hefur meiri sjálfvirkni en sá borbúnaður sem unnið hefur verið með fram að þessu. „Tilkoma hans er mikilvægt skref fram á við í bortækni hér á landi en borinn verður ekki aðeins nýttur á Ngatamariki jarðhitasvæðinu, heldur stendur líka til að nota hann við rannsóknarboranir á nýjum svæðum og við endurnýjun á eldri borholum."