Í lagi að gefa peninga á viðskiptalegum forsendum

Þingmaður kallaði Landsbankann í dag Hróa Hött vegna niðurfellinga á skuldum viðskiptavina. Ráðherra segir að bankarnir megi gefa peninga geri þeir það á viðskiptalegum forsendum.

Eins og fréttastofa greindi frá í gær er til skoðunar í fjármálaráðuneytinu að krefja viðskiptavini Landsbankans, sem fá endurgreidd 20 prósent vaxta frá 1. janúar 2009 og til dagsins í dag, um endurgreiðslu vaxtabóta þar sem forsendur vaxtabóta séu brostnar ef vextir eru endurgreiddir. Þá er til skoðunar að skattleggja niðurfellingu skulda hjá bankanum sem tekjur.

Úrræði Landsbankans, sem ganga lengra en úrræði hinna bankanna, voru gagnrýnd á þinginu í dag. „Nú er þessi banki farinn að leika Hróa Hött og farinn að lækka vexti frá árinu 2009,2010 og 2011 um 20 prósent, sem menn hafa greitt þar inn. Hann ætlar að beita 110 prósenta reglunni án tillits til annarra eigna sem menn eiga," sagði Pétur Blöndal, þingmaður Sjálfstæðisflokksins, á Alþingi í dag.

Kristján Kristjánsson, talsmaður Landsbankans, sagði við Stöð 2 í dag að bankinn liti svo á að tillögurnar rúmuðust innan gildandi lagaákvæða um endurskipulagningu skulda. Því ætti skattlagning ekki að koma til álita.

Fjármálaráðherra segir til skoðunar hvort niðurfellingarnar rúmist innan gildandi sérákvæða um skuldavanda heimila. En er ekki allt í lagi að bankinn gangi lengra en hinir bankarnir og leyfi viðskiptavinum sínum að njóta góðs af miklum hagnaði? „Bankarnir verða auðvitað bara sjálfir að svara fyrir það hvernig þeir mæta sínum viðskiptavinum og hvaða aðgerðir þeir fara í væntanlega til þess að bæta sín eignasöfn, til að auka greiðslugetu sinna viðskiptavina og aðstoða þá. Við erum auðvitað fylgjandi því að þeir gangi eins langt og þeir treysta sér til og geta, að sjálfsögðu. En þeir verða að forsvara það á sínum viðskiptalegu forsendum."

Hvers vegna þurfa þeir að gera það? Af hverju mega þeir ekki bara gefa peninga? „Ef þeir ákveða að gera það má segja að það sé þeirra mál. Það er væntanlega gert þá með einhverja slíka hugsun að leiðarljósi að það sé liður í því að bæta eignasöfnin, að bæta greiðslugetu og greiðsluviljann," segir fjármálaráðherra. thorbjorn@stod2.is