Til skoðunar að skattleggja skuldaniðurfellingu hjá Landsbanka

Til skoðunar er í fjármálaráðuneytinu að krefja viðskiptavini Landsbankans um endurgreiðslu á vaxtabótum vegna endurgreiðslu sem þeir fá frá bankanum. Þá verður niðurfelling skulda hugsanlega sérstaklega skattlögð sem tekjur.

Landsbankinn hyggst endurgreiða viðskiptavinum sínum 20 prósent af greiddum vöxtum frá 1. janúar 2009 og til dagsins í dag. Þá ætlar bankinn að fella niður hluta af yfirdráttarskuldum og ótryggðum skuldabréfum auk þess sem bankinn hefur rýmkað svokallaða 110 prósenta reglu vegna áhvílandi veðskulda eigin húsnæðis en bankinn hyggst miða við matsverð fasteignar, en ekki markaðsverð eins og hinir bankarnir. Það þýðir meiri skuldaniðurfellingu.

Úrræði Landsbankans ganga mun lengra en úrræði hinna bankanna. Þá tilkynnti bankinn stjórnvöldum ekki sérstaklega um málið áður en úrræðin voru kynnt og samkvæmt heimildum fréttastofu fréttu bæði efnahags- og viðskiptaráðherra og fjármálaráðherra af þessu í fjölmiðlum.

Samkvæmt heimildum fréttastofu er nú rætt af fullri alvöru í fjármálaráðuneytinu að krefja viðskiptavini Landsbankans um endurgreiðslu á greiddum vaxtabótum. Þá er jafnframt verið að skoða sérstaka skattlagningu á niðurfellingum skulda hjá viðskiptavinum Landsbankans.

Litið á niðurfellingu sem gjöf

Samkvæmt upplýsingum fréttastofunnar er litið á niðurfellinguna sem gjöf. Steingrímur J. Sigfússon, fjármálaráðherra, segir þó að engin ákvörðun hafi verið tekin um þetta. „Það þarf að skoða rækilega þessar aðgerðir Landsbankans og í hverju þær eru fólgnar. Þá þarf að skoða þær í samhengi við andlag vaxtabóta, eftir því sem það á við, eða skattlagningu slíkra skuldaniðurfellinga ef þetta rúmast ekki innan þeirra sérákvæða sem í gildi eru. Almennt er það þannig að svona skuldaniðurfelling er ekki andlag skattlagningar á grundvelli sérstakra ákvæða sem við settum í lög bæði 2009 og útfærðum betur 2010. En ef þetta fer út fyrir þau mörk þá þarf að skoða slíka hluti. Almennt fá menn ekki greiddar vaxtabætur vegna þess kostnaðar sem menn hafa borið. Það hljóta allir að sjá," segir Steingrímur. Hann segir að forsendur fyrir vaxtabótum séu brostnar fái menn vextina endurgreidda.

Heldurðu að það muni ekki valda mikilli reiði í samfélaginu ef þið farið að skattleggja þessa niðurfellingu sem þið lítið á sem gjöf? „Það er nú algjörlega ótímabær umræða. Því við erum ekkert farin að skoða þessa útfærslu hjá Landsbankanum, hvers eðlis hún er. Að hvaða marki þetta rúmast innan þeirra reglna sem nú eru í gildi um skuldaleiðréttingu og endurskipulagningu skulda. Við skulum taka eitt skref í einu og þetta verður skoðað og ótímabært að gefa sér neitt fyrirfram í þeim efnum." thorbjorn@stod2.is