Aðalmeðferð í máli Hauks Þórs - aftur

Aðalmeðferð yfir bankamanninum Hauki Þór Haraldssyni fer fram að öðru sinni í Héraðsdómi Reykjavíkur í dag. Haukur, sem starfaði hjá Landsbankanum fyrir hrun, var ákærður eftir hrun fyrir fyrir að millifæra 118 milljónir króna af reikningi félagsins NBI Holdings Ltd. 8. október 2008 inn á eigin reikning.

Félagið, sem var í eigu sjálfseignarsjóðs á Guernsey og laut stjórn Hauks, hafði legið í dvala í hálfan áratug, en var áður notað af bankanum til að halda utan um eignarhluti í fjármálafyrirtækjum sem hefðu komið til frádráttar eigin fjár bankans ef þeir hefðu verið í efnahagsreikningi hans. Haukur segist hafa ætlað að bjarga fénu frá því að verða að hverri annarri kröfu í þrotabú bankans síðar meir.

Við fyrri meðferð málsins fyrir Héraðsdómi Reykjavíkur krafðist saksóknari 4 ára fangelsis yfir Hauki. Hann var sýknaður í Héraðsdómi Reykjavíkur. Málinu var þá áfrýjað til Hæstaréttar.

Dómurinn ómerkti dóm Héraðsdóms Reykjavíkur og vísaði málinu til efnislegrar meðferðar þar á ný og því fer aðalmeðferð fram í annað skiptið í máli Hauks í dag.