Nýtt hótel opnar á Akureyri

Í dag opna Icelandair hótel formlega nýtt hótel á Akureyri: Icelandair hótel Akureyri. Félagið hefur gert leigusamning til næstu 20 ára um rekstur heilsárshótels í húsinu að Þingvallastræti 23, en þetta sögufræga hús, sem áður hýsti m.a. Iðnskóla Akureyrar, hefur nú í vetur verið stækkað og sniðið að þörfum hótelreksturs.

Þingvangur ehf er eigandi að fasteigninni ásamt öllum byggingarrétti á lóðinni að því er fram kemur í tilkynningu. „Aðaleigandi Þingvangs ehf er Pálmar Harðarson. Icelandair hótel Akureyri mun bjóða uppá alls 101 herbergi, 63 herbergi voru tilbúin þann 9 júní s.l., en við bætast 38 herbergi í byrjun júní 2012.“

„Auk þeirra herbergja sem tilbúin eru, er jafnframt tekin í notkun veitingasalur og bar, ásamt skjólgóðum garði sem mun nýtast hótelgestum og Akureyringum allan ársins hring,“ segir ennfremur. „Á Icelandair hótel Akureyri er mikil áhersla lögð á góðan aðbúnað fyrir skíðafólk, en upphitaðir skápar og geymslur hafa verið útbúnar í kjallara hússins. Garður hótelsins er einnig all sérstakur, þar sem aðbúnaður gerir ráð fyrir að gestir geti átt þar notalega stund hvort sem er að vetri eða sumri.“   

„Við höfum lengi haft augastað á Akureyri sem vænlegri staðsetningu fyrir nýtt hótel í okkar keðju, en jafnframt viljað vanda valið á byggingu og samstarfsaðilum", segir Magnea Þórey Hjálmarsdóttir, framkvæmdastjóri Flugleiðahótela ehf.  „Icelandairhótel Akureyri er því kærkomin viðbót í okkar rekstur, og við hlökkum til að leggja okkar að mörkum við að byggja enn frekar upp það góða starf sem átt hefur sér stað í ferðaþjónustu Akureyrarbæjar fram til þessa", segir Magnea að lokum.