Afnám gjaldeyrishafta mikilvægt skref - evran verði tekin upp sem fyrst

Afnám gjaldeyrishafta er veigamikil forsenda þess að íslensk fyrirtæki komist aftur á alþjóðlega fjármálamarkaði. Þetta er á meðal þess sem fram kemur í skýrslu efnahags- og framfarastofnunarinnar OECD um Ísland.

Skýrslur af þessu tagi eru gefnar út um einstök ríki með reglulegu millibili, en að þessu sinni kveður við nokkuð svipaðan tón og heyrst hefur frá öðrum alþjóðastofnunum: Að Ísland sé nú á réttri leið við að leysa úr fjármálakreppunni, en enn séu þó ljón í veginum.

Það sem er kannski sérstakt við skýrslur OECD er hinn mikli fjöldi ráðlegginga sem stjórnvöldum er gefinn til að eiga við vandamálin framundan.

Til dæmis víkur stofnunin að gjaldeyrishöftunum, og segir afnám þeirra veigamikla forsendu þess að íslenskt fyrirtæki komist aftur á alþjóðlega fjármálamarkaði. Því lengur sem höftin verði við lýði, því meiri óhagkvæmni í ráðstöfun fjármuna leiði þau til, minni ávöxtunar og meiri brenglunar í ákvarðanatöku. Um leið og takist að ná tökum á óstöðugum aflandskrónueignum útlendinga eigi að afnema höftin.

Þá eigi Íslendingar að stefna að upptöku evru sem fyrst, en krónan sé minnsti sjálfstæði gjaldmiðill heims.